Spellchecker.lu » Archiv

Spellchecker.lu fir den iPhone

Michel — Fri, 23 Jan 2009 21:53:12 +0000

D’Handy-Versioun vu Spellchecker.lu ass elo optiméiert ginn fir iPhone an iPod Touch.

Fir drop zouzegräife kann een um iPhone de “Safari” starten an op d’Adress m.spellchecker.lu navigéieren. Do kann een en Text oder och just e Saz aginn, a sech dann duerch d’Korrekturresultater duerchklicken. An engem zweete Schrëtt kann een zousätzlech och nach d’Eifeler Regel korrigéiere loossen.

Et gëtt och eng Méiglechkeet fir Spellchecker.lu op der iPhone-Startsäit ze installéieren. Wéi dat geet ass an der Billerserie ënnert dësem Text beschriwwen.

De Service selwer ass gratis, well en als Internetsäit funktionéiert falen awer déi üblech Daten-Tariffer vum jeeweilege Provider un.

Benotzung vu Spellchecker.lu um iPhone:

Installatioun um iPhone:

Eifeler Regel: Nei Versiounen

Michel — Wed, 18 Apr 2007 22:00:08 +0000

Op der Download-Säit ginn et elo nei Versioune vun der Software fir d’Eifeler Regel ze verbesseren. Nierft wiesentleche Performanz-Optiméierungen, déi virun allem béi groussen Texter bemierkbar wäerte sinn, ass och d’Gréisst ëm bal d’Halschent reduzéiert ginn.

Beim Plugin ass virun allem d’Installatiounsroutin vereinfacht ginn: ee Klick op de Fichier geet elo duer. De Rescht geet automatesch. Dernieft ass ee Feeler korrigéiert ginn deen ënner bestëmmten Ëmstänn verhënnert huet dass de Plugin korrekt funktionnéiert. Ausserdem kann een de Plugin elo iwwert den Extension Manager vum OpenOffice automatesch updaten.

Bemierkung: D’Technik fir d’Eifeler Regel am Online-Checker ze erkennen ass ëmmer nach net aktualiséiert ginn. D’Uni huet leider bis an de Summer d’Iwwerhand geholl. Bis dohi ginn et leider och keng aner gréisser Neierungen.

Eifeler Regel – Elo awer richteg

Michel — Wed, 15 Nov 2006 22:00:37 +0000

Säit haut gëtt et op der Download-Säit eng nei Software fir d’Eifeler Regel ze verbesseren. Et gëtt esouwuel eng Plugin-Versioun fir OpenOffice.org wéi och en eegestännege Programm fir Benotzer vun anere Schreifprogrammer. Dëse Programm ass eng Ergänzung fir de Spellchecker. Déi aktuell Versioun ka just d’Eifeler Regel verbesseren, mee verschidde grammatesch Regele sinn an der Entwécklung. De Programm schafft mat enger spezieller Mustererkennung fir ze bestëmmen ob ee Wuert ënnert d’Eifeler Regel fällt oder net.
Et ass dëst och den Nofolger vum technesch ënnerleeënen ale Plugin, deen zu Gonschte vun der méi schneller Technologie verworf ginn ass.

Bemierkung: D’Technik fir d’Eifeler Regel am Online-Checker ze erkennen ass nach net aktualiséiert ginn.

Thunderbird op Windows a MySpell/Aspell- op Debian an Ubuntu

Michel — Mon, 26 Jun 2006 22:00:47 +0000

Vun haut un haut ginn et zousätzlech zu den Installatiounspäck fir OpenOffice.org och Päck fir Mozilla Thunderbird op Windows, an Installatiounspäck fir MySpell an Aspell op Debian oder Ubuntu/Kubuntu. Alles ze fannen am Download-Beräich. Bleiwt drop hinzeweisen dass, wéi och de Spellchecker fir OpenOffice.org an den Online-Checker, och dës Installatiounspäck Beta-Versioune sinn an nach Feeler enthalen!

Weiderhi vill Spaass mam Spellchecker,
D’Team vu Spellchecker.lu

Nei Versioun vum “Online-Checker” (dës Kéier mat “Witz”)

Michel — Sun, 07 May 2006 22:00:48 +0000

Säit haut ass eng verbessert Versioun vum Online-Checker disponibel. Nieft enger nach méi schneller Verbesserungsvitesse an enger méi intuitiver Oberfläch ass och d’Erkennung vun der Eifeler Regel erweidert ginn.
Ausserdem gëtt et eng alternativ Versioun déi ee kann ouni Computermaus benotzen. Dës Versioun kann och mat textbaséierte Browseren (wéi beispillsweis Lynx) benotzt ginn.

Reaktioun op de Feedback

Michel — Sun, 23 Apr 2006 22:00:24 +0000

Mir freeën eis iwwert dee ville positive Feedback dee mir nom Lancement vun eisem Projet kritt hunn. Mir hunn awer och konstruktiv Kritik erhalen, a wëllen an deem Sënn nach eng Kéier verstäerkt drop hiweisen dass de Projet sech nach an enger Testphase befënnt (Beta-Phase). Trotz der viller Aarbecht déi mir bis elo schon investéiert hunn ass et net ausgeschloss dass bei de Korrekturvirschléi vum Spellchecker eventuell Wierder ugebuede ginn déi net der gängeger Schreifweis entspriechen. Mir schaffe stänneg un der Verbesserung vum Projet a sinn iwwer all Ënnerstëtzung an all Hiwäis op Feeler dankbar.

D’Team vu Spellchecker.lu