De Pit, en treie Spellchecker.lu-Benotzer, war esou fäin fir mer eng kleng Erweiderung fir de Site ze schécken. Mat der OpenSearch-Funktionalitéit, déi elo an de Site integréiert ass, kann een am Firefox an am Internet Explorer iwwert d’Sichfeld vum Browser direkt bestëmmte Wierder sichen.
Am Browser e Wuert an d’Sichfeld aginn… :
… a scho gëtt d’Resultat op Spellchecker.lu ugewisen:
Eng detailéiert Beschreiwung ass um Pit sengem Blog ze fannen.
De Michel Weimerskirch war e Mëttwoch, 13. Januar, um Radio 100,7 an der Sendung “Invité virum Dag” op Besuch. De Gilles Wunsch huet him live op der Antenn Froen iwwert de Projet Spellchecker.lu gestallt.
En Enregistrement vun der Emissioun kann een op 100komma7.lu eroflueden a lauschteren (MP3-Fichier).
Säit haut kann een déi nei Versioun vum Email-Programm Thunderbird eroflueden. Zu den innovativen Neierungen gehéieren: Tabs fir méi Emaile gläichzäiteg duerzestellen, eng performant Sichfunktioun mat “Timeline” an eng nei Archiv-Funktioun. Erofluede kann een déi nei Versioun op getthunderbird.com.
Natierlech kann een och an dës nei Versioun de Spellchecker.lu-Plugin ganz einfach abannen fir feelerfräi Emaile kënnen ze schreiwen. Download an Installatiounshiwäiser op der Download-Säit.
Haut viru genee 4 Joer ass duerch d’Enregistréiere vum Domain-Numm Spellchecker.lu den éischte Grondsteen fir de Projet geluecht ginn. E puer Méint méi spéit, den 22. Abrëll 2006, konnt een déi éischte Kéier Lëtzebuergesch Texter op www.spellchecker.lu verbesseren.
Spellchecker.lu ass elo och op Twitter vertrueden: http://twitter.com/spellchecker_lu. Ech versichen an Zukunft iwwert dëse Kanal kleng Status-Updaten ze verbreeden.
Doriwwer ewech gëtt et scho méi laang och e Profil op Facebook: http://www.facebook.com/pages/Spellcheckerlu/61111806577. Och hei wäert ech weiderhin aktuell Informatiounen iwwert de Projet bekanntginn.
