Aktualitéit

Aktuell Informatiounen iwwert de Projet

spellchecker-app-collage

Nei Versioun vun der Spellchecker.lu-App fir Android an iOS

Ufank dëser Woch gouf eng nei Versioun vun der Spellchecker.lu-App verëffentlecht. D’App ass deen ideale Begleeder fir jiddwereen, dee Lëtzebuergesch schreift. Se erméiglecht entweder eenzel Wierder, oder awer ganz Texter ze korrigéieren.

Net nëmmen Orthographiesfeeler kënne korrigéiert ginn, mee och déi sougenannt “Eifeler Reegel”, eng phonetesch Reegel mat där esouguer Mammesproochler hir Problemer hunn. Dee verbesserten Text kann duerno direkt kopéiert, als Email oder SMS geschéckt, oder an engem soziale Reseau gedeelt ginn.

Déi nei Versioun bitt nieft villen Detailverbesserungen e komplett neien a modernen Design. Se gouf entwéckelt vu Lightbulb s.à r.l., der Web-Agence déi de Michel Weimerskirch – Grënner vum Projet Spellchecker.lu – viru knapp dräianhallef Joer matgegrënnt huet.

D’Orthographieskorrektur leeft iwwer e gesécherte Server vu Spellchecker.lu; eng Internet-Connectioun ass also obligatoresch fir d’App benotzen ze kënnen.

D’App ka gratis bei Google Play oder am App Store erofgeluede ginn. Ausserdeem ass se als Online-Versioun op https://m.spellchecker.lu vun all Smartphone aus erreechbar.

Nieft dëser App bitt Spellchecker.lu nach vill aner Servicer, wéi eng Online-Korrektur, Download-Versioune fir d’Korrektur an divers Programmer ze integréieren an och nach zwou weider Appe fir Android.

Méi Informatiounen: https://spellchecker.lu/apps/classic/
App Store: http://itunes.apple.com/fr/app/spellchecker-lu/id404387442
Google Play: https://play.google.com/store/apps/details?id=lu.spellchecker.android

Weiderliesen Commentaire schreiwen

Beispill

Spellchecker.lu elo nach méi performant

Ee Korrekturprogramm lieft vun enger Wierderlëscht, fir ze definéiere wat richteg a wat falsch geschriwwen ass. Dës Lëscht muss gefleegt a gefiddert ginn. Fir d’Korrekture vu Spellchecker.lu nach ze verfeineren, gouf d’Wierderlëscht dofir verbessert an ausgebaut.

All Dag benotzen 2800 Leit den Internetsite Spellchecker.lu. Egal ob fir Bréiwer, Affichen, Gebuertsdagswënsch an aner lëtzebuergesch Texter. Am September krut de Projet e gréisseren Update dee vläicht net direkt opgefall ass an awer vu grousser Wichtegkeet ass. Ënnerstëtzung krut de Michel Weimerskirch, Grënner vum Projet Spellchecker.lu, dobäi vum Edson Souza Morais, Student an der Informatik. Allebéid beschäftege si sech an hirer Fräizäit vill mat der lëtzebuergescher Sprooch an hirer Schreifweis.

De Kär vun all Orthographiekorrekturprogramm ass eng Lëscht mat Wierder, déi de Programm als korrekt erkennt. Gëtt een e Wuert an, dat net op där Lëscht steet, da fënnt de Programm Wierder déi ähnlech geschriwwe sinn, a schléit déi fir d’Korrektur vir. A genee dës Wierderlëscht gouf elo komplett nei opgebaut. Zil war et, eng méi konsistent Lëscht ze hunn; dat heescht d’Schreifweise vu Wierder déi ähnlech geschriwwe ginn oder en ähnlechen Urspronk hu goufe vereenheetlecht. Doduerch konnt och d’Unzuel u Feeler reduzéiert ginn.

Insgesamt kennt Spellchecker.lu elo iwwer 230 000 Wierder a Wuertformen. Iwwer 30 % vun de Wierder an der Lëscht sinn nei. 20 % vun de Wierder goufen iwwerschafft, geännert oder ergänzt. Nieft gängege Wierder, wéi der “Kéiswurscht” an dem “Kinosfilm”, kennt Spellchecker.lu elo och nei Kreatioune wéi d'”Zukunftskeess” oder Anglizisme wéi “Cosplayer” an “Hipster”. Och de “Pokémon” ass keen Onbekannte méi.

Fir dat Ganzt méiglech ze maache gouf eng speziell Gestiounssoftware entwéckelt mat där nei Wierder kënnen agedroe ginn, oder existéierend Wierder oder Declinaisounsregele verbessert kënne ginn. Doduerch gëtt d’Lëscht an Zukunft méi einfach z’ergänzen, an de Spellchecker.lu doduerch ëmmer méi praktesch fir den alldeegleche Gebrauch. An noer Zukunft kréien ausgewielt Partner, déi de Spellchecker.lu selwer benotzen, Accès op dës Software, fir d’Lëscht selwer ergänzen ze kënnen.

Déi nei Wierderlëscht ass säit Mee schonn an der Online-Versioun am Gebrauch a säit September och als Download fir LibreOffice, Firefox, Ubuntu a Mac OS ze kréien. Spellchecker.lu ass um Wee fir sech ëmmer méi als Referenz fir d’Lëtzebuerger Orthographie z’etabléieren.

Leider kritt de Projet keng Ënnerstëtzung vum Ministère de la Culture oder aneren offiziellen Instanzen. Iwwer hir Budgetsmëttele gëtt säit 2004 un enger Wierderlëscht mat Iwwersetzunge geschafft. Op méifach Nofro war et awer net méiglech, Accès op dës Aarbechten ze kréien, sou datt d’Equipe vu Spellchecker.lu hir Lëscht ouni extern Hëllef nei opgebaut huet, an dat innerhalb vun engem Joer an der Fräizäit. Net auszedenken, wat duerch eng Kooperatioun während deenen 12 Joer méiglech gewiescht wier.

Weiderliesen Commentaire schreiwen

spellchecker

Neien Design

Spellchecker.lu begleet vill Mënschen déi Lëtzebuergesch schreiwen am Alldag. Pro Dag besiche ronn 1’300 Leit d’Internetsäit a korrigéiere méi ewéi 80’000 Wierder. Säit haut weist sech d’Internetsäit an engem mei modernen an iwwersiichtleche Layout.

Déi nei Homepage passt sech elo och automatesch u mobil Geräter wéi Smartphones an Tablets un. Benotzer hunn doduerch e besseren Zougrëff op déi verschidden Déngschtleeschtungen vu Spellchecker.lu. Dozou kënnt dass d’Startsäit opgeraumt ginn ass, de Fokus läit elo méi op Informatiounen iwwert de Projet a seng verschidde Produiten.

Deen opgefrëschten Design gouf mat der Ënnerstëtzung vu Lightbulb, der neier Firma vum Projetsgrënner Michel Weimerskirch, ëmgesat. An de kommende Woche gi verschidden Erklärfilmer produzéiert, déi op eng einfach Manéier d’Funktioune vun deenen ënnerschiddleche Produite weise wäerten.

Weiderliesen Commentaire schreiwen

lightbulb-cover

An eegener Saach: Lightbulb s.à r.l.

Haut um 24. Abrëll hunn ech mat zwee Kollegen zesummen eng nei Firma gegrënnt: Lightbulb s.à r.l., eng Web-Agence, déi sech op modern an innovativ Websäiten a Web-Applikatioune spezialiséiert. Meng perséinlech Erfahrung a méisproochege Siten an intuitive Content-Management-Systemer wäert ech dobäi an all eis Projeten abréngen.

De Spellchecker.lu-Projet gouf am Joer 2006 gegrënnt, also viru bal 7 Joer, wéi ech nach op der Uni war. Virun 3 an engem halwe Joer, direkt no der Uni, hunn ech mech als Web-Entwéckler selbstänneg gemaach a säitdeem ganz vill Projete fir vill interessant Partner ëmgesat. Elo ass et un der Zäit fir deen nächste Schrëtt.

Wat bedeit dat fir Spellchecker.lu?

De Projet kritt e weidere kommerzielle Partner deen hëlleft de Projet weider mat no vir ze bréngen. Nieft engem komplett neie Produit dee geplangt ass, bidde mir eise Clienten en integréierte Spellchecker direkt am Administratiounsberäich vun hirem Site un. Donieft hu mer nach e puer aner flott Neierunge geplangt.

Lightbulb s.à r.l.

Fir iwwert d’Aktivitéite vu Lightbulb ze informéieren hu mir och eng Facebook-Säit an en Twitter-Profil ugeluecht. Alternativ kanns du dech och op lightbulb.lu bei eisem Newsletter abonnéieren, fir iwwert de Lancement vun eisem Site informéiert ze ginn.

Merci fir d’Ënnerstëtzung!
Michel Weimerskirch

Weiderliesen Commentaire schreiwen

live-screenshot_combined

Nei: “Spellchecker.lu Live”-App fir Android

Dës Woch gouf déi nei “Spellchecker.lu Live-App” presentéiert, déi iwwert déi lescht Méint entwéckelt gouf. D’App bitt eng simultan Orthographiekorrektur fir Geräter déi mat Android 4.0 lafen. No der Aktivéierung integréiert sech de Service a sämtlech Textfelder vun all App: Egal ob SMS, Email, Facebook, Twitter, oder a soss enger App – iwwerall kann ee seng Lëtzebuergesch Texter verbessere loossen. (méi…)

Weiderliesen Commentaire schreiwen