Informatiounen

Informatiounen iwwert de Projet Spellchecker.lu

E Spellchecker ass e Programm, deen d’Korrektheet vun eenzele Wierder an engem Dokument iwwerpréift. D’Zil vun dësem Projet ass et, ee Spellchecker fir déi lëtzebuergesch Sprooch ze entwéckelen, mat deem een online, offline an ënnerwee seng Lëtzebuergesch Texter schreiwen a korrigéiere kann.

“Online” duerch den Online-Checker dee mëttlerweil iwwer 2’900 Leit pro Dag benotzen. Fir “Offline” gëtt et d’Méiglechkeet Erweiderungen fir LibreOffice, Firefox, Thunderbird an anere Programmen erofzelueden. Säit kuerzem ginn et och Apps. Dat a Form vun enger “klassescher” Versioun fir Android an iOS an eng “live” Versioun déi just op Android 4.0-Geräter (ausser Samsung) funktionéiert. Mir verbesseren natierlech stänneg d’Qualitéit vum Spellchecker.

Eis Sprooch soll doduerch erëm méi dacks am Alldag ze liese sinn, an se soll doduerch ëmmer méi opliewen a méi Wäert kréien. D’Wierderlëscht ass fir jidderee fräi zougänglech, a gëtt ënnert der EUPL-Lizenz verëffentlecht.

Virkenntnisser fir Lëtzebuergesch ze schreiwen

Fir Spellchecker.lu sënnvoll kënnen ze benotzen, ass e Mindestmooss u Kenntnisser an der Orthographie néideg. E Spellchecker ass e Computerprogramm deen d’Orthographie vun engem Wuert oder engem Saz préift an automatiséiert Verbesserungsvirschléi ubitt, ouni awer de Sënn vum engem Saz ze verstoen. De Benotzer muss also selwer kënnen entscheede, wat fir Verbesserungsvirschléi sënnvoll sinn, a wat fir net.

Problemer trieden z.B. bei Homophonen op (Wierder déi d’selwecht kléngen awer ënnerschiddlech geschriwwe ginn, wéi z.B. “dënn”/”den” oder “op/ob”), oder bei Wierder déi duerch en Accent, en Trema oder en zousätzleche Buschtaf d’Bedeitung änneren (z.B. “Déier”/”deier”, “wëll”/well”, “kennen”/”kënnen”, “den”/”deen”, …). Als Benotzer sollt een déi fein Ënnerscheeder kennen, fir dass de verbesserten Text Sënn mécht.

Wéi kann ech léiere richteg Lëtzebuergesch ze schreiwen?

Fir unzefänken ass den Artikel Eis Schreifweis an der Lëtzebuergescher Wikipedia ganz interessant.

Weider Links: